誇口為亞洲國際城市的香港有七百幾萬人，但原來一年只賣得出幾隻白金唱片。有把口就可踩上台開個唱，樂壇落得如斯田地，只能嘆咎由自取。相比下，曾連續七星期咬低對手成為FreestyleRapBattle傳奇MC的歐陽靖（Jin），貨真價實得多。連08美國總統大選民主黨候選人之一的奧巴馬，都以其最新HipHop單曲作為造勢大會的開場曲。抵Jin得戚話︰「我𠵱家唔使靠唱片公司！」
記者︰梁敦濂
攝影︰陳陶鈞
銅記玩Rap冇人識
未成名前，Jin常於夜店和街頭玩FreestyleBattle，每次現場反應熱烈。今次難得來港，當然帶他到銅鑼灣記利佐治街行人專用區獻技，順帶一試港人對呢種街頭玩意的接受程度。晚上8時許，見人流暢旺，期望一個半個MC出現對招，可惜反應靜過鬼。
1.Jin先用大聲公叫「歐陽靖Jin嚟咗銅鑼灣同你FreestyleRap呀，埋嚟喇喂。」但途人一於少理。
2.他一邊介紹自己，並表示會進行FreestyleRap，但依舊無人駐足觀看。
3.終有識貨之人認得他，上前邀請Jin簽名及影相留念。
4.見慘淡情況持續，突然Jin見遠處有件真人扮的和牛，靈感到，即席Rap出︰
YoHongKongWhat'sWrong？
YoCausewayBay可唔可以開少啲K？
我JinThaMC同你喺度講吓道理，
無錢就搵嘢做又有幾出奇，
扮塊牛扒派傳單點解要自卑，
做自己咪理外人嘅勢利，
人哋睥你你就睥番人哋。
人哋睥你你就睥番人哋。
出歌求己不求人
對於簽唱片公司，Jin心中有刺。02年，Jin連贏七星期RapBattle後人氣急升，唱片公司RuffRyders即時羅致他，連《TheNewYorkTimes》亦找上門約訪問。照道理應順勢出唱片，卻遇上公司架構重整，拖足超過一年，所以今日Jin不望外求。「合作到咪合作，好似我做緊新唱片，自己Produce，做完咪試吓搵公司發行。TouchWood搵唔到，咪放上網畀人Download，Radiohead都係咁啦！時代唔同，新嗰套唔係以前咁玩，唔使再靠唱片公司。」
唱片公司他顯得不提也罷，反而想分享主題講Life的新唱片︰「我唔想好似其他人，唔講女就講BlingBling，再唔係講槍同Drugs，好悶。今次講生活，無論Birthday定Funeral，每人都會經歷到，無得避，你唯有『TrytoEnjoyEveryMoment』。」聽落好似幾有道理。
狠批政府電子傳媒
講狠，Jin唔夠MC仁。但講準，無人能及這長期在美國Hip-Hop界打滾的ABC，他數美國電視台，「佢哋同唱片公司夾好晒，譬如電視台話今個月想90%都係播Hip-HopMV，唱片公司就會提供呢個數嘅MV出嚟，冇話黑暗唔黑暗，個Business就係咁！」而Jin對新一代DJ亦顯得失望，「我之後好似後繼無人，其實幾唔開心。人係有，但所謂人才都係雷聲大雨點小。美國周街都係Rapper，想突圍而出要更努力，做啲特別嘢，包括我自己在內都要。」
不只為電子傳媒痛心，Jin就連政府也要批算一番。「人話AmericaisGreat，其實有邊個政府係Perfect？我哋話有言論自由，但你試吓一班人聚埋大叫『NoWar』，你估警察埋嚟時會點？我本身唔理政治，直至近排偶然看到奧巴馬（BarackObama）嘅資料，感覺同佢有種Connection，於是寫咗首《OpenLettertoObama》放上Myspace，佢聽到後仲鍾意到用埋喺造勢大會時用。但我無所謂，總之大家記住去投票。」
香港始終得LMF
音樂冇疆界，Jin由美國說到香港Hip-Hop︰「香港最好都係LMF！（成十年仲係講緊LMF？）。佢哋無論Music同Beat都好正，Lyrics好勁，MC仁好Standout，阿肥阿傑把聲都好Powerful，DJTommy更加無得頂。」但他覺得LMF散Band後，香港嘅Hip-Hop少咗Supporters一樣，他認為Hip-Hop要一代一代傳落去。力量唔夠，其實可靠唔同MC多做Crossover，多啲Featuring，聽嘅先覺得新鮮。「大家團結搞番個Movement，LMF本來係一個推動Hip-Hop文化嘅好例子。其實𠵱家陳子聰隊廿四味可做到呢個Movement，做一個全新局面，廿四味成功唔一定要靠唱片公司。至於農夫，嘿嘿！嗰首歌講風水幾搞笑，Lyrics好順，個Flow好Smooth，Rhythm正。但邊個係麥玲玲？」
精選推介Jin之口水交
提了多次FreestyleBattle，其實玩法是每回合都有一名台柱同一名挑戰者，題目不限，但多數MC喜以尖酸刻薄的用語挖苦對手，在DJ捽碟的30秒內將對手打低而得分。勝出者即時成為新台柱，接受下場參賽者的挑戰。如能連勝7場，就可獲邀進入HallofFame﹗在YouTube上，可找到Jin的多段大戰。
1.Jin新仔上場來勢洶洶，台柱Hasan疑壓力過大，於末段竟然Rap到爛尾，衞冕失敗。
2.FreestyleFriday第七星期作賽，Jin臨尾用中文Rap將Sean擊倒，評判Wyclef睇到成個彈起。
3.故事未完，Wyclef好欣賞Jin的RapTalent，仲同Jin玩番RoundBattle。
4.Jin最後一擊，寸MCVerse用詞重複兼無Point，瀏灠人次超過44萬。
歐陽靖Profile
Jin82年6月4日於美國邁亞密出生，父母係當地開唐餐館嘅香港移民。初中時開始迷上Hip-Hop，更將NotoriousB.I.G.同Jay-Z視為偶像，自始每日都跟同學在學校飯堂玩FreestyleBattle。
01年，Jin搬往Hip-Hop文化更盛的紐約居住，正式推出自己製作的Mixtape及開始夜店至街頭的Freestyle表演生涯，後憑參加黑人電視台BET著名節目《106&Park》的FreestyleFriday環節一鳴驚人，連贏七星期後獲邀進入RapBattle名人堂，旋即獲唱片公司簽約成為首位亞裔美籍Rapper。04年首張大碟《TheRestisHistory》銷量超過二十萬張。目前他正忙於製作第六張個人專輯《Birthdays,Funerals,andEverythinginBetween》。
