新一屆區議員就快上任，候任山頂區議員陳淑莊Tanya準備就緒，連議員辦事處都搵埋。不過，山頂區寸金尺土，一個豆腐膶咁細嘅地方隨時租金都要幾皮嘢，Tanya話連一塊階磚都租唔起，所以只能退而求其次，揀咗上環樂古道一棟大廈開議辦。
據聞嗰處有200呎鬆啲，細係細咗啲，但有獨立廁所，對職員嚟講方便好多。個業主都幾有公民責任感，知道Tanya係用嚟做議辦，就自願減租，結果由7,000蚊左右減到𠵱家嘅6,200蚊，減輕Tanya嘅負擔。雖然由山頂去上環有一段距離，但Tanya希望佢啲選民可以稍移玉步，仲話議辦出面絕對方便停車，希望大家多多幫襯。