究竟香港幾時有雙普選？喺北京開會嗰班人大常委呢幾日鬥卸膊，鬥交波，睇嚟承諾要喺任內解決雙普選問題嘅煲呔，嚟緊點兌現呢張支票，真係有排頭痕。唔知係咪費事撞到香港班記者追問呢壇嘢，往年多數喺香港過聖誕嘅煲呔喺平安夜過咗大海，去澳門中區嘅主教座堂，參加由澳門教區主教黎鴻昇主持嘅子夜彌撒。
帶大相機影教堂
煲呔老婆嘅娘家喺澳門，聽講煲呔以前去開澳門，都會去澳門主教座堂望彌撒。不過，佢噚日一身自由行look，孭埋部大相機入教堂，仲猛影個祭台，又不時抬頭欣賞教堂啲彩色玻璃，唔講仲以為佢係新嚟嘅。
八方聽聞，煲呔今次帶埋老婆同個仔過大海望子夜彌撒，澳門座堂方面都係好遲先知。有關方面原本預咗第一行幾個位畀澳門嘅行政法務司司長陳麗敏，但煲呔嚟埋唔夠坐，惟有將第一行讀經員嘅位讓出嚟先搞掂。
望完彌撒，煲呔行出嚟時撞到當地記者，但就只係講咗聲「聖誕快樂」就拜拜。如果八方喺現場，一定問吓佢祈禱時，有冇同天父講：「神啊！請給我普選時間表。」呢？