昂坪360纜車重開，喺十二月二十二日做冬之日舉行重開儀式，商務及經濟發展局局長馬時亨與港鐵主席錢果豐、總裁周松崗等率領重要人物一齊上山，以行動證明纜車好安全，冇危險。
一班傳媒老總應邀參加，但相信有好多人因為唔願意咁早起身，十點鐘就去到東涌，所以冇出現。左丁山掹車邊，充大頭，傍住一啲老總上車，都係第一次搭昂坪纜車啫。更且係第一次去東涌，出咗地鐵站，都唔知纜車站在那方，跟住好多人上咗商場，愈行愈覺得唔對路，幸好卒之碰到一位實Ｑ，得佢指點先至知道一出地鐵站向左望到「商務」與「上海商業」，行過去就見到纜車登車處。
十時十五分後，馬局長駕到，眾人跟住尾上車，咦，纜車好妥當啫，十分穩陣，上到天空望落嚟，風景好幽美，眺望機場，先知道機場面積之大，客運大樓只佔一個小部份。可惜呢，懸浮粒子滿天，煙霧迷濛，似有三層白紗布掛在窗前。如果有一日天朗氣清（例如今年七月間），見到藍天白雲嘅話，在纜車上睇風景，可以回味無窮。
無驚無險，二十五分鐘後到達昂坪，馬局長好識做，話要刺激本土經濟，立即買咗好多頂昂坪360喼帽，送畀各人，既有馬局長做範例，左丁山走入昂坪市集掃貨，一張金牛居然唔夠使，本來仲想買嘅，但一啲用品太重，驚挽到手跛，唯有作罷。錢主席買咗一副古老玩藝，考左丁山：「呢啲係乜？」睇落去係天九牌，但隻武九冇紅色點，又唔見隻「地」，李華明議員話：「又唔似係天九牌噃！」錢主席買完，左丁山想跟住買一副返屋企研究，誰知全間店舖只得一副，主席買咗就冇貨咯。
行嚟行去行到腳軟之後，一個人坐一個車廂落番東涌，下望幾百呎山頭，不斷有人行上山，真係佩服「毅行者」啲腳骨力，亦見到有唔少山墳，以前啲村民如何抬先人棺木上山呢？真係諗唔到！坐昂坪纜車十分舒服，但重開後，每日會有萬幾人排隊上車，左丁山不知何日會再來咯。
自己試車，平穩到極，後來有報道話，一啲纜車有小意外，相信係纜車重開仲未清除啲bugs啩。