回歸10年，香港人變得越來越忙，民主、藍天同維港樣樣都要出盡力爭，結果民主發展一團混賬、藍天變灰天、維港幾乎填平，末代港督肥彭最近撰文講香港回歸感受，佢話回歸10年香港環保大倒退，長此下去唔速速解決呢個問題，投資者同埋就業機會都會流走咁話。
肥彭接受天主教教會刊物《鼎》邀請，寫咗篇文抒發己見，據知原本只寫500字，結果一寫不可收拾，最終交咗900字。佢喺文章度劈頭就講民主發展，佢指北京如果持續拒絕港人對民主嘅渴望，可能激起過度反應，但佢優先關注嘅原來係環保問題，佢話珠江三角洲工業化，令到香港污染越來越嚴重，一定要急急改善先有救。