孫公成日俾人話係老油條，但原來對於一啲嘢，佢都可以幾鍥而不捨㗎。好似今年嘅新聞人物、9歲神童沈詩鈞，早喺佢獲大學取錄前，教育局建議佢不如讀小學，俾人話保守；事隔多月，詩鈞已經係浸大數學系學生，教育局仍建議佢讀為中小學生而設嘅資優數學課程。不過，沈爸爸沈振雄已經婉拒咗局方「好意」，請孫公食檸檬。
八方聽聞，詩鈞今年喺浸大開學後不久，教育局已經再聯絡佢，邀請佢修讀畀9至12歲學生修讀嘅資優數學課程。八方問過佢Daddy沈振雄，佢話局方確係曾經透過浸大聯絡佢，但佢認為個仔既然已經讀緊大學，冇需要讀番中學或者小學課程啫，故此已經透過浸大婉拒咗教育局嘅「好意」。
教育局稱絕冇強迫
負責照顧沈詩鈞嘅浸大數學系教授唐創時同浸大嘅公關，都唔想回應呢件事。教育局方面就同八方解釋，話佢哋建議沈詩鈞參加教育局提供嘅數學奧林匹克課程，但絕冇強迫佢參加，亦冇建議過佢讀9至12歲學生而設嘅數學培訓課程。教育局仲話，𠵱家為資優學生提供嘅數學專題訓練、良師指導計劃、奧林匹克活動等等，都極具挑戰性，絕對唔係小兒科、𡃁仔嘢。
教育局話，佢哋同浸大都認同除咗大學嘅課程外，希望可以為沈詩鈞提供一啲「同儕學習活動」，好似語文呀、音樂呀、體育呀、藝術呀咁，對佢學習同成長都有正常幫助。
聖誕假睇書做練習
八方唔係教育專家，但就請教過科大理學院院長鄭紹遠，問佢點睇。佢認為，沈詩鈞已經升讀大學嘅數學課程，唔需要額外修讀奧林匹克數學課程，唔明白教育局點解提出呢個建議，佢覺得教育局應該為詩鈞提供一啲協助佢成長嘅課程先啱數。
至於神童嘅聖誕會點過呢？咁梗係唔會好似八方咁淨係掛住吃喝玩樂，亦唔係好似時下一啲大學生咁去唱K隊酒啦。沈爸爸話，佢哋向來唔着重物質，所以冇話特別去食聖誕大餐或買聖誕禮物，但詩鈞就收到兩本數學書，一本係教授送，一本係朋友送，所以詩鈞今個聖誕假會睇書同做練習。