安歷卡雖然係臭馬，但無可否認佢係「弗」馬！睇情況保頓喺明年1月嗰陣，都係留唔住呢位法國國腳囉。安歷卡啱啱喺英超聯幫球隊主場大勝伯明翰3:0，第1球係佢助攻畀廸奧夫建功，之後自己仲梅開二度㖭！𠵱家安歷卡已經喺英格蘭入夠100球，如果計埋社區盾所入嘅兩球，仲已經入咗102球㖭！呢位旺友隨時喺下月成為車路士成員。
傳摩帥過AC撬杜奧巴
近期成日傳曼聯同車仔對安歷卡好有興趣㗎喇，1月轉會市場重開，車仔似乎對安歷卡志在必得咁喎！聽講前車仔領隊摩連奴好可能喺季後取代安察洛堤，擔任AC米蘭嘅新教練，佢錫杜奧巴錫到燶係人都知，呢位科特廸瓦射手仲傳係摩帥頭號羅致目標㖭！
車仔最近先話過前線要大清洗，要將舒夫真高同比沙路套現買人，講到最行嘅肯定係用1,000萬鎊（1.54億港元）收購安歷卡呢單嘢。諗諗吓真係越嚟越似，因為AC嗰邊都放咗些少風聲出嚟，話就算摩連奴未傾掂，佢哋照樣會喺下月斟杜奧巴。
安歷卡呢排咁「弗」，俾大球會昅中好正常，如果佢踢埋車仔嘅話，除咗曼聯之外，英超4強都踢過3隊喇。最慘係保頓嗰邊，新領隊美臣上任後好似有番啲起色，不過球隊仍然徘徊喺降班區域（截至22/12排第14位）。
安歷卡咁有市場價值，睇嚟美臣都係留佢唔住；正如佢賽後話齋：「我知車路士對安歷卡好有興趣，但都係報紙講嘅啫，冇領隊打電話畀我噃！」唉，美臣你醒吓啦，你瞓醒嗰陣安歷卡可能已經着住車仔波衫喇！