民主黨前日起喺立法會外絕食爭取2012雙普選，又餓又凍過咗一整日，餓到面青唇白嘅主席何俊仁口震震咁同八方講，陳太噚日朝早到場探班，逗留接近一個鐘頭為佢哋打氣，成班絕食勇士好鼓舞。
仁哥又話，陳太現身吸引好多喺附近欣賞聖誕裝飾市民，好多人排隊同佢合照，陳太變成人肉聖誕佈景板。
過去兩日忽然落雨，天氣驟冷，仁哥話成班兄弟頂住凄風冷雨好狼狽，獲通融喺立法會騎樓底避雨。見到民主黨員咁慘情，唔少市民送上果汁、粥同靚湯畀佢哋飲，但由於佢哋事先講明唔飲有色嘅嘢，所以睇得唔飲得，通通婉拒，仁哥又笑稱多得公民黨湯家驊到場唱歌打氣，唔少黨員話聽到歌聲當堂飽晒喎。