今個聖誕節，台灣幫殺入香港，唔少台灣受歡迎嘅藝人包括棒棒堂、可愛教主楊丞琳、黑澀會美眉、唐禹哲同蔡依林等都由台灣飛嚟香港出席平安夜及聖誕節商場騷，跟香港歌迷歡度佳節。
噚日棒棒堂、楊丞琳和唐禹哲先後抵港，機場一早逼滿等候偶像嘅fans，最先抵埗嘅係唐禹哲，戴上太陽眼鏡嘅佢於下午2點步出，近30名fans蜂擁而上，連原本等候棒棒堂嘅fans也趨上前湊熱鬧，加上大會安排嘅10多名保安，登時一大班人圍住唐禹哲。接過fans送贈嘅玫瑰花後，唐禹哲親切地同fans揮手，仲以普通話同fans講「聖誕快樂」。
楊丞琳甩踭
相隔不久，風魔萬千香港少女嘅棒棒堂浩浩蕩蕩步出機場，逾百名fans不顧儀態衝上前親近偶像，有fans爭先恐後湧前，連鞋都甩埋，不過棒棒堂表現親民，出閘後，仲應電視台要求喺現場唱咗一小段《WeWishYouaMerryChristmas》，又同fans握手，𠱁得佢哋好開心。
可愛教主楊丞琳就喺4點半步出，同樣戴住太陽眼鏡嘅佢，喺6、7名保安簇擁下，都有近30名fans接機。佢貫徹可愛教主作風，除跟歌迷握手外，仲大講聖誕快樂，佢嘅fans十分熱情，竟然踩甩咗可愛教主嘅鞋踭，要佢彎低身整理。此外，台灣天后蔡依林會喺今日下午3點現身MegaBox舉行新碟簽唱會。
