港燈（006）大手加價6%，港燈加價雖已較中電（002）頻密，但係到兩電一齊加，港燈還是加得比中電的4.5%為多，反映有些人有些公司，賺不到最盡還是不會心息，正如同某啲富豪講社會責任，永遠聽唔入耳，港島居民惟有繼續捱貴電。
高盛出報告唱好
有啲姓氏家族嘅股票沾不得手，有啲上市公司分拆出嚟嘅子公司，亦被稱為散戶殺手，中信泰富（267）今年分拆大昌行（1828），雖獲某大師股評人極力睇好，但股價由上市首日最高6.04元反覆下跌，上周五已跌至3.35元，較招股價5.88元勁跌43%。
大昌行在港從事汽車及食品貿易40年，股價都搞成咁，另一隻子公司中信1616（1883）命運都差唔多，今年4月初掛牌高見4.54元後就係咁跌，唔使幾耐更加連招股價2.58元都跌穿埋，上星期曾跌穿2元水平，大半年來邊個位入都要輸。
不過呢隻咁惡搞嘅股上星期五竟然罕有地出現一支大陽燭，勁升12%收市，睇番報紙，原來又係大行效應。高盛出報告表示，中信1616資產規模改善、估值吸引，風險回報平衡，首次將其納入研究股份，給予買入投資評級，目標價3.20元。該行指，明年會有更多利好因素，令公司利潤率將有所改善，盈利存在上升空間，預期集團07至09年的盈利複合年增長率達28%，前景理想。呢隻另類電訊股，的確相當低殘，但係有無得炒，係另一回事，況且高位大把蟹貨。
東亞現價買得過
同系仲有隻弱股中信國金（183），早前任總話有本地銀行投資次按產品料會見紅之後，頭號嫌疑之一中信嘉銀，上周發表有關投資SIV結構投資工具嘅減值情況，有大行詳細睇過之後，相信集團全年業績應免於見紅，可獲微利。呢個消息，或有助本地銀行股重拾本月初時之強勢，首選銀行股係東亞銀行（023），早前獲中銀香港（2388）以每股51元入股，現價都係差不多，買得過。