自從傳出金管局總裁任志剛就快退休，佢嘅敢言作風真係有過之而無不及，繼早前大談財爺曾俊華應該開倉派錢還富於民之後，又批評中央金融政策令好多原本合情合理嘅跨境金融活動，有可能變咗唔合法。但任總呢一種作風，網友都幾受落，有網友喺《香港討論區》話唔捨得任總落台㖭。
tik_on好撐任總咁話：「外圍因素，唔通叫佢去救次按、中央宏調咩，唔通叫佢去干預國家政策？香港基調冇變仍然良好，係自由巿場。亂出招干預先令人反感。」lckdbl好感慨咁話唔想佢落台，不過「人始終會老，佢始終會有走嘅一日，就好似格老一樣。」
又唔係個個都咁唔捨得佢，好似kk1233就認為任總貢獻少，比起星洲淡馬錫，「佢只值五班馬，星洲少少錢賺多多，香港就多多錢先賺少少。」佢舉例話：「喺2000年中石油（857）加埋幾多優質國企上市，淡馬錫目光如炬，一馬當先，偏偏喺金礦口嘅香港就無動於衷。落台！」
Grisword睇完反而覺得任總做得幾好，「起碼幫香港投資賺錢，唔明點解仲俾人話人工貴。」
http://www8.discuss.com.hk/viewthread.php?tid=6065879&highlight=%A5%F4%C1%60