平安夜好多大機構都趁公眾假期前開派對，飲飽食醉抽完獎，大家就提早收工，八方要返工對此得個「恨」字，同病相憐嘅理大員工向八方投訴，佢話理大人事部日前發出電郵，指校方知道噚日好多同事開party，為方便大家happy，所以特准教職員可以早退，下午1點鐘就可以放工。
呢位投訴人話白紙黑字畀員工早退好離譜，因為唔係個個部門都搞派對，冇得開派對嘅職員已經夠慘，仲要冇得早退，好唔公平。理大發言人解釋，容許教職員喺大時大節前夕早退係多年傳統，適用全體員工，冇party開嘅可以自己搵節目。開party豐儉由人，八方畀條橋理大員工，下年食件蛋糕就當開party，咪可以奉旨早退囉。