呢排煲PS3隻《GT5P》，煲到廢寢忘餐，本來今日諗住繼續大講IntegraTypeR點樣攻陷埋B級賽事，點知《GT5P》臨近聖誕更新咗三段「GT-TV」頻道，雖然並非山內一典劈日產GT-RPart3，不過就係應景不過嘅聖誕主題；內容都幾盞鬼得意，講聖誕老人今年唔要鹿仔幫手，改為揸開篷車派聖誕禮物！三段片以日本、英國同德國做背景主題，聖誕老人就分別揸番當地嘅大發OFC-1、LotusElise同寶馬135iCoupe出發，襯着三首柔和聖誕BGM，相當之有節日氣氛，尤其一大堆閃爍燈飾及巨型聖誕樹，在1080p高清顯示下，真係漂亮得令人着迷！
每段片約110MB、2分鐘長，好快就Download完三段片，有PS3及《GT5P》嘅機迷值得一看，事關過咗聖誕節就未必再Download得番㗎喇。
記者：徐影龍