我們每年都有大大小小的願望，但能兌現的又有多少。不過當小記見到枱頭嘅鹹魚形mousepad，上面寫住：「人冇夢想，同條鹹魚有咩分別」，就即時諗通。又啱喎！有願即有求，雖然有求未必應，但起碼有渴求，就有動力去衝去繼續努力。咪以為人人願望複雜又貪心，其實如果每人只可許一個願，小朋友不外乎讀書成績好，大朋友則希望世界和平同身體健康。願望未成真？唔緊要，請繼續許願。
“IwishthereforeIam﹗”
記者︰劉明慧、劉昱蘭
攝影︰梁細權、陳陶鈞、陳盛臣
Cherry，9歲，孝順女
我想要一條珍珠頸鏈，因為我仲未儲夠錢送畀媽咪。
Kathy，模特兒
讀書同賺錢養自己都同樣兼顧到，同埋最好唔太辛苦。
文文，5歲，愛公主玩具
可唔可以要一對蝴蝶翅膀，又靚又可以帶我周圍飛呢？
陳生、陳太，文員
如果可以同一家人過一個白色聖誕就最好。
銘詩，11歲，小記者
可以做小記者訪問多啲名人、鋼琴考到8級、讀書科科滿分……
林林，1歲，愛說話
BuBuWuuuuuuuuuuu~~ShiShi~
嘉龍，11歲，住天水圍
人人都話保良局百周年中學好，所以如果入到就好。
李生，文員
囡囡幾時都咁好動有活力，咁日後做乜都好㗎喇。
李太，主婦：大家身體健康。
懿珊，11歲，籃球隊隊員
全班考第一、入到好中學、學屆籃球攞第一、校際鋼琴比賽攞第一……
Simmie，10歲，小五生
我想同聖誕老人過聖誕。點解我個聖誕老人咁瘦？因為佢係我爸爸囉。
曉盈，11歲，小六生
就嚟升中，所以最重要係入到心儀嘅英文中學。
嘉曦，7歲，愛打機
如果接駁住聖誕燈飾嘅電線，盡頭有一部PSP同PS3就好喇！
陳生，文員
小朋友快高長大，讀書順順利利。
陳太，主婦：無風無浪，想嗰樣有嗰樣。
鍾太，主婦
希望囝囝生性，讀書精叻。
皓晴，5歲，愛玩車仔
我好想揸巴士，快啲大個仔可以揸巴士就好喇！
關太，主婦
老公事業有成，人人家庭幸福仔女聽話，世界和平。
煒婷，11歲，小六
樂理又要考，中學又要考，樣樣合格樣樣都係Band1。
梁生，退休人士
身體健康最重要，無論自己定係個孫，總之全家健健康康。
