花旗股市向好，帶動昨日亞洲股市炒上，港股有501點升幅，好多揸咗股票過周末嘅股民都應該滿意，但係揸貨過聖誕嘅股民，假期後有冇糊食，就要睇吓昨晚花旗股市點走嘞。
早兩日花旗嗰邊證實咗「超級救市基金」臨門一腳撻Q，計劃要取消，因為幾間大行班到水入股自己間公司之後就表示冇興趣參加個救市基金，冇咗幾間大行，個基金點會搞得成。
新世界破20日線阻力
咁係咪話幾間大行冇義氣呢？咁又唔係，搞個基金表面係為人為己，實際都係為咗自己，次按個氹咁大，個基金要幾大先救得掂？事實上引入咗新資金嘅大行其實都仲係未填夠數，仲邊度有能力幫人。基金搞唔成已經預咗，咁樣對花旗股市會唔會有衝擊？壞嘅影響一定有，但係𠵱家講緊年尾埋數交數，基金呢幾日應該仲會頂住個市，昨晚花旗股市如果再大幅抽升一啲都唔出奇，但過咗年就唔敢講嘞。
恒指昨日升破20日線，但冇拋離呢條線，隨時可以跌番落去，不過，禮拜五係期指結算，好淡雙方會盡地一煲，放完假港股可能會好波動，大家要格外留神。
新世界C輪9918：新世界（017）昨收28元，升破20日線阻力，半日市成交唔算多，不過個勢就幾好，放完假如果成交多番，升破28.30元就可以買啲C輪9918，博正股升破30元試32元，9918昨收61仙，槓桿率4.6倍（有效3.7倍），正股升上32元，9918應該喺96仙水平，正股跌穿26.50元止蝕。