今日聖誕前夕，普世歡騰，對股民來說，2007年旺了大半年，雖然第4季表現略為失色，但整體而言，仍可以話係一個豐收嘅年份，恒指由年初的20000點升到10月底的31958點，大升60%，唔少股票升幅更以倍計，其後出現正常的獲利回吐調整，但由於資金因素對股市仍屬有利，估計調整過後，明年港股有力再展升浪，甚至再創新高。
3項因素影響港股
趁聖誕及新年假期，初步研究一下08年的投資策略。現時對港股影響最大的3項因素，係美國次按危機、中國的宏觀調控和資金直通車；次按和宏調對股市利淡，但在明年上半年都應該有一個「了斷」，反而對港股利好的直通車，大有可能在明年第1季便會開通。
美國次按危機衝擊比預期大，迫使聯儲局和歐英央行連環出招，注入以萬億元計資金，紓緩信貸市場緊張；另外聯儲局亦推出多項新措施，協助次按借款人度過難關。市場普遍預期明年首季會係次按「爆煲」的時刻，但在各方同心「救市」下，相信已成功「拆彈」，雖然距全面解決危機仍有漫漫長路，但衝擊應已大為紓緩。
中國推行宏觀調控開始見效，樓市和股市都已由高位回落。今年內，存款準備金率已調升10次，最近一次（12月8日）更重手加1%至14.5%，而人行上周四亦宣佈今年第6次加息，防止經濟增長過熱及抑制通脹，初步估計存款準備金率會加到16%，而人行會再加息多2至3次，宏調就會告一段落。
H指已由高位回落
港股直通車威力好大，一時話開，一時話唔開住，都已經令指數和股價大上大落。直通車泊在天津車站，已有好幾個月，現時中港兩地政府正努力磋商有關的細節安排，相信好快可達成協議，正式開車。早前有消息，話唔想內地股民接火棒，只要H股由高位大幅回落後，就係直通車開通之時。現時H股指數已由11月初的高位20609跌到16000點，調整逾20%，回落到較合理水平，上車時機成熟。
明天開始，一連幾日，推介08年初選的心水股。