中國通脹率上揚，中國人民銀行於是在○七年內第六次加息，希望遏制消費物價，降低固定投資增長率：以中國官方術語嚟講，呢啲叫做「從緊貨幣政策」。以前講「適度從緊」，中共十七大會議之後，刪去「適度」二字，只講「從緊」。GDP增長方面，以前講「又快又好」，○八年開始，要講「又好又快」，好字行先。好就係指低耗能、低污染、注重環保嘅增長。快就係指追求高速度。換言之，○八年開始，如果地方官盲目追求增長，去到11%，但當地污染增加，耗能增加，地方官仍然會被炒魷。話就係咁講嘞，能否真的做到，事後先至知。
「從緊」有令人不明白之處就係調整利率之時，中長期存款加息二十七點子（0.27%），但活期存款利率就下調九點子。例如活期存款利息由0.81%降低至0.72%，一年期存款利率由3.8%升至4.14%。有何目的呀？就係鼓勵居民將活期存款抽調往定期存款，減少市場流動性。
人民銀行如此做法，令人費解，啲中央金融高官，有冇研究數據㗎？現中國人民存款接近四十萬億，近半擺放在活期存款，清楚說明中國散戶唔貪較高利息，鍾意資金可隨時調動，央行降低活期存款利率，只會鼓勵居民短炒股票與炒樓，而呢兩樣活動都係中央唔想見到嘅。此外，大部份銀行存款屬於活期，減息嘅直接效果係降低銀行嘅資金成本，增加利潤。例如六個月貸款利率加咗九點子，去到5.7%，與活期存款嘅息差就由以前嘅（4.8%減0.81%）3.99%升到（5.7%減0.72%）4.98%，擺明係擺錢入銀行個袋，令銀行更想運用借短貸長嘅策略。
睇真啲，央行之所謂「從緊」，得啖笑，商業銀行歡迎到極，銀行股可睇高一線。或者，央行與中銀監還有另外一套行政指令，阻止銀行擴大貸款嘅，我哋係外人，不得而知。從公開政策資料睇，央行明為阻壓通脹，暗裏保護銀行利潤。如果央行夠膽將活期存款大幅度增加調升至2%嘅話，銀行利潤必定受打擊，但人民一定歡迎，會自動減少炒樓炒股，對整體經濟有利。今中國人民銀行反其道而行之，只證明「從緊」係政治口號而已。