力追榜首阿仙奴的曼聯，在周日英超早場迎戰愛華頓時得幸運之神眷顧，該隊憑傑斯完場前3分鐘博得一個爭議性12碼，再由基斯坦奴朗拿度（C朗）操刀中鵠終險勝2:1。曼聯贏波後18戰得42分續排次席，暫落後阿仙奴1分。 畢傑
愛華頓賽前已連贏10口亞洲盤，或多或少嚇退不少上盤客，曼聯單W及「主勝」賠率俱轉冷；反而愛華頓客W及「客勝」受球迷追捧，起票至8.5倍及2.9倍開賽。
曼聯小將森遜冇料到
今仗不少球員各自倒戈，包括曼聯的朗尼，以及愛華頓的菲臘尼維利及侯活均面對前球會。上半場火藥味甚濃，開賽14分鐘內球證已發出4面黃牌警告雙方隊員。早段曼聯誤傳不少，而愛華頓防線亦穩固，致主隊不易組織埋門機會。22分鐘，C朗憑個人技術扭過卡斯利後，再用左腳射個曲墜球收死門將侯活，領前客軍1:0，開出5.5倍「首球」。
曼聯今役右閘位置由首次正選上陣的森遜擔任，這名小將不時露出缺口。終在27分鐘，愛華頓中場派拿左路長傳，伏兵禁區內的卡希爾力壓艾拉以頭槌頂入。其後雙方出現不少推撞及口角場面，火爆人物包括泰維斯、朗尼、卡希爾及菲臘尼維利等人，最終1:1言和完半場，而球證共發出5面黃牌。
愛華頓輸波仍贏盤
換邊後曼聯相繼換入沙夏及奧沙，可惜C朗的「窩利」抽射，以及朗尼的攻門雖極具威脅，但始終未能再射破愛華頓大門。戰至87分鐘，曼聯中場傑斯禁區內僅被派拿後腳輕微碰倒，但球證卻直指12碼點；其後C朗一射中鵠，終險勝2:1開出「和局」。愛華頓被終止13場不敗走勢，惟亞洲盤（是役亞洲盤愛華頓受讓一球/球半）仍連贏11口，續當「盤王」。
