平安夜燈飾：冰火16飾

睇過今年維港聖誕燈飾，好多人都話明顯比往年慳皮咗！商場負責人話行「燈火管制」都係跟大勢，為環保節能。剩番嘅Budget就可以大搞室內裝飾，甚至安排更多表演項目！今晚平安夜，通宵達「誕」在所難免。我哋特別請嚟HotCha×Freeze，帶你睇勻港、九16個熱點的最靚燈飾，免費攞禮物。原來今年白「飾」聖誕係主流，仲有失驚無神的飄雪帶來驚喜。驚玩過龍返唔到屋企？下面有平安夜特別公共交通安排，昅實尾班車時間，就唔怕送車尾啦！

記者：朱崇德、陳諾堯
攝影：陳盛臣、陳陶鈞、伍慶泉、朱崇德

HotCha三妹出名活力過人，仲越夜越生猛，竟然可以用兩粒鐘行盡九龍區4個有睇頭的燈飾商場。apm天鵝城堡、又一城聖誕光影范特西、朗豪坊白色夢幻樹林和海港城歡樂傳雪都各有特色，要趁假期Hea盡呢4大燈飾，即Check商場必影靚位！

■兩位男粉絲知道Regen胃痛，立刻奉上胃藥，照顧周到。

■靚女唔一定只係得男Fans，Winkie和兩個女粉絲一樣有講有笑，玩自拍。

■走咗4個場影燈飾，兩位男粉絲全程跟足兩小時，癡心一片。

■連HotCha入電梯都依依不捨，真係服咗佢哋。

■來到最後一站海港城，一班粉絲來張大合照，齊說MerryChristmas！

觀塘apm　過飄雪聖誕玩天鵝

要兩粒鐘Hea得鬥多商場睇燈飾，HotCha聖誕燈飾遊的第一站選擇了觀塘apm。今年apm玩創新，聖誕唔出鹿車出天鵝。以天鵝為主題的城堡高20呎，面積達6,000平方呎，一入apm就已經可以望得清清楚楚。雖然地方不大，但勝在靚景都十分就腳，一眼關七。聖誕期間更有飄雪玩，HotCha嘩聲四起，興奮非常！

■apm內共有6隻大天鵝，連Crystal都大叫鍾意。

■位於大堂的漫天雪花湖，聖誕期間，每逢6、7、8和9時有飄雪睇，想過白色聖誕的朋友就唔好走寶喇！

九龍塘又一城　變色聖誕樹有氣派

沿住港鐵順路落，下一站殺到又一城。他們的聖誕樹每年都是室內最高，今年仲要用幻彩LED燈泡，令樹身會轉出5個不同顏色，非常有氣派。以聖誕光影范特西為主題，大玩北歐雪國Feel，有透明SchimmelK213大鋼琴配襯着幻彩雪國，感覺十分冬日。HotCha更攬住聖誕老人唔放，大唱聖誕歌，仲和他暢談廣東話呢！想搵聖誕老人影相？可以到LG2碰運氣喇！

■聖誕老人畀班靚女攬到實，你都咪話唔高興！

■三個大讚又一城聖誕樹夠氣勢！

■幻彩北歐雪國的仙子橋，雪國還會變色的。

旺角朗豪坊　白色夢幻樹林

要夠熱鬧，HotCha第三站就選了朗豪坊。呢兩星期，朗豪坊特別人頭湧湧，想行埋去影白色樹林的小動物都寸步難行，只見閃光燈閃個不停。白色樹林在港已很難得一見，呢個更靚在會不停變色，仲可以畀你一次過見埋粉紅、粉紫和螢光綠森林。雪白的動物擺設共有20種，雖然只係得個外形，但形態和大小都模仿得跟真動物很相似，小女孩看見又愛不釋手，左攬右騎。