平安夜前夕，傳來一個壞消息。資深新聞工作者、《南華早報》專欄作家KevinSinclair噚日凌晨兩點喺威院病逝，享年65歲。入行40年、72年加入《南早》做採訪主任嘅Sinclair，上個星期三先啱啱為佢本回憶錄《TellMeaStory:FortyYearsofNewspaperinginHongKongandChina》舉行簽名會，特首曾蔭權、周一嶽、鍾逸傑同李麗娟等現任同退休高官都有去攞簽名。
據《南早》中人講，Sinclair嘅遺孀同仔女會依照佢嘅遺願，將遺體捐畀大學做研究，亦唔會舉行葬禮，只會搞一個派對慶祝佢豐盛嘅一生，同時謝絕帛金花牌，想表達心意嘅亦會捐畀癌症組織。