美股上周五利用期貨及期權等三期結算日，加上連串「好」消息──科技股業績理想、零售銷售超標和多國財富主權基金扮救世主，有心人遂借機奮力搶高，一來挾淡倉，二來營造年尾「正」數好交代，3大指數分別升1.55%至1.94%不等。
其實亞太及歐洲股市早已在打鑼打鼓，本來已呈疲態的澳紐股市打頭陣先升1.3%和1.16%；跟住亞洲「3大投注站」（日、韓、港）勁升1.5%至2.26%不等，再到歐洲3雄（德、法、英）發威分別升1.39%至1.7%不等，聖誕如此重要的大節日，又怎可以不普天同慶乎？
美國七勞八傷，為甚麼股市如斯硬淨？
都話美經濟靠兩條腿支撐，地產個條腿已宣佈駁「義肢」都企唔穩，股市這條腿又怎可以跛？好在「盜亦無道」的金融機構個個「自食其果」之時，有亞洲及中東主權財富基金扮主耶穌基督打救，才不致瞓低，若連「水管」都爆埋，汝道美國經濟會變成怎麼樣？阿布扎比投資局及中投分別為花旗及大摩注資，剛收到消息新加坡淡馬錫或為美林注50億（美元．下同），這些大水喉必定好過甚麼美國製造的M-LEC「大水喉」（基金）啦！話就800億，有事上嚟不知救得邊個，光看聯儲局的「定期資金拍賣」行動，以至歐洲央行做「黃大仙」的一眾金融機構如餓狼般搶錢情況，可有嚇閣下一跳？現在不惜有人打救將個市炒高，你估美經濟──企業盈利前景真係好好咩？
不過金融機構中若然不知道執輸行頭必定慘過敗家之道理，以為黃河之水天上來會源源不絕便大錯特錯矣！