今日係乜日子？左丁山父親生前叫今日做耶穌誕，好多年前嘅本地中文報紙稱十二月二十五日為耶誕，我哋一路讀書一路知道今日叫做聖誕節。叫耶誕其實準確一啲，畢竟不是天主教徒或基督教徒嘅話，未必視耶穌為聖人。英文Christmas本是Christ'smass兩字合成一字，互聯網上有大堆資料講羅馬天主教會將好多不同民族宗教嘅風俗習慣引入教會，包裝成天主教嘅禮儀、節日；遠在古羅馬年代，羅馬人自十二月十七日起就慶祝Saturnalia，直至新年後，期內大吃大喝，互相贈送禮物，追求異性。羅馬人發現每年十二月二十二日（中國冬至）之後，每日嘅日光時間開始增加，而十二月二十二日係太陽神死亡之日，三日後（十二月二十五日）太陽神復活，帶來新的陽光，新的希望，所以人們要狂歡派對慶祝，豎起綠樹（代表evergreen）。
呢種習慣，完全被日後嘅天主教/基督教採用於「耶穌誕」，與其話耶穌誕係一個天主/基督節日，不如話係古代羅馬人節日變成宗教化，引入宗教成份。我哋呢類非教徒，趁十二月二十五日放假，派禮物，家庭團聚，當係復古可也，不必一定帶上宗教色彩。至於耶穌誕何以譯為聖誕，想來係一啲上兩代中國文人/傳教士故意誤譯，以便宣傳嘅，到了今天，不必深究了，當作約定俗成便是。
今年聖誕前，市道旺到飛起，中環人頭湧湧，汽車與行人都發覺寸步難行，連陸羽茶室晚飯廳座，居然在聖誕前後，連續幾晚地下爆滿到三樓，夥計都話乃近年罕見，相信蘭桂坊更加旺，難怪蘭桂坊有一個不夠一千呎嘅單邊地舖竟然以天價一億六千萬元出售。咁嘅價錢入貨，若計四厘回報率，一年咪要收租六百四十萬，每月呎租接近六百元？在蘭桂坊飲杯酒，零舍貴啲，就係呢個道理。
當今世上，以金融行業最容易搵大錢（次按除外），故此香港獨旺中環，人在中環，好容易以為世界一切美好，故此久唔久就有不同人士到中環街頭遊行爭取權益，其實對中環人可以產生正面嘅警惕性作用。