前名嘴黃毓民擔大旗嘅社民連總部位於尖沙嘴金巴利道，噚日有傳媒指社民連租用單位個業主係江湖猛人「鬼添」李育添，由於毓民同「鬼添」熟稔，可以「友情價」租用。毓民噚日同八方講，今次擺明有人玩嘢要抹黑佢，佢指雖然李育添曾入獄，但已事過境遷，向佢租用單位冇問題，「程介南、詹培忠、曾德成都坐過監，唔通其他人都唔可以同佢哋做生意？」
坦承同「鬼添」好老友
毓民承認同「鬼添」老友，對方係泰拳理事會會長，佢係副會長，租用對方單位係合法商業安排，至於租金幾多錢，佢就堅拒透露。毓民行走江湖多年，認為事件小事一樁，社民連副主席勞永樂卻認為要開會討論並向外解釋，不過毓民認為多此一舉。
有社民連成員指，毓民交遊廣闊眾所周知，同江湖中人有交情絕不稀奇，相信事件唔影響社民連。據講社民連下個月改選主席，如無意外毓民應該連任。毓民出年有意出選立法會，𠵱家已經有「黑材料」針對佢，八方認為佢應該高興，如果佢冇實力，對手使乜咁緊張？不過香港選民要求政客有「政治潔癖」，同台灣唔同，毓民應該好清楚。