所謂一朝天子一朝臣，80歲嘅香港電影大亨鄒文懷，呢頭將經營咗47年嘅電影同影院生意，賣咗畀44歲嘅橙天娛樂董事長伍克波，點知3個月過渡期未過，鄒文懷假假哋都仲係嘉禾娛樂（1132）嘅顧問，伍克波就出手郁人。
嘉禾發出通告，話佢哋經已喺12月21日嘅董事會會議上，決定終止同董事總經理潘從傑嘅僱傭協議，雖然明知港交所（388）規矩係主席唔應該做埋董事總經理個位，但伍克波仍堅持呢個位由自己做住先。
原來潘生做咗投行同機構財務顧問21年，估計鄒大亨當年搵佢睇住嘉禾盤數，之不過，人家啱啱至喺8月21日簽咗新合約，聖誕節前就請人食無情雞，係咪唔多畀面老鄒呢？