長沙灣嘅天價單幢樓一號紐約，唔經唔覺都賣出咗半數單位，平均價6000蚊呎，聽講有一半係投資者入市。憑良心講，純睇個盤嘅地點，除咗要向發展商寫個服字，仲要為班咁勇嘅炒家寫個讚字。
一號紐約周圍唔單止有唐樓、工廈、醫院、投注站、老人院、服務性行業，原來仲有墳場，大大個長沙灣天主教墳場就喺呈祥道側邊山坡上，一號紐約高層向西北嘅單位，除咗擁有開揚西斜山景，仲好可能睇埋先人聚居地。
都係傳統智慧講得好，買樓買現樓，實地睇過，就唔使估吓估吓啦。不過，現階段都冇辦法實地求證，因為一號紐約仲有兩個幾月先落成，不過，華華有次喺附近試過用水平角度影相（圖），大家自己估吓睇唔睇到嘞。
查實好多賣到成萬銀一呎嘅樓，都會望墳景，好似東半山、跑馬地、薄扶林域多利道一帶，啲老牌豪宅同墳地相處幾十年，一齊見證香港樓市盛衰。𠵱家一號紐約先至賣6000蚊一呎，濕濕碎啦。