八方唔識玄學、唔信流年，指點迷津並非強項，但預測政壇怪事你不可不聽。新年仲有幾日先到，𢱑頭嘢已經開始爆發，首先出爐嘅係「自由黨豪請2,000個綜援家庭探米老鼠」，精明如你，一聽就覺得奇，等八方揭開謎底啦。
入場費已使40萬
八方聽講，自由黨喺嚟緊禮拜四，即係拆禮物日翌日，會請2,000幾個綜援家庭入廸士尼玩番日，仲book咗差唔多40架旅遊巴，實行一條龍包車包食包玩，計吓條數，淨係入場費都至少40萬，果然係富貴黨嘅氣派，到時該黨巨頭都會現身，廸士尼高層仲會到場派禮物㖭。
八方雖然唔好記性，但勝在朋友多，有同事突然提起，原來當年社福界爭取提高綜援標準金額時，自由黨一力反對，話怕啲人濫用，後來報紙、電視台出咗一大堆講呃綜援嘅報道，富貴黨睇完明明仲話要整返個監察機制，點解𠵱家又「忽然基層」呢？
仲有呀仲有呀，田少向來身嬌肉貴，突然紆尊降貴搞基層同樂日，一定係有怪事發生啦。見到呢啲異象出現，八方即刻屈指一算啦──哦哦哦，腥風血雨嘅立法會選舉仲有半年就殺到埋身，競爭肯定好激烈，一票都不能少，綜援戶嘅票自然唔少得啦，明晒！
嚟緊田少出戰新界東、周梁就選新界西，呢兩區草根巿民當然唔少，與其身水身汗遊行爭取加綜援，或者搞咩東龍島一日海鮮團呢啲cheapcheap活動，來佬貨廸士尼奇幻之旅梗係高檔好多啦。
為咗來年立法會選舉，又唔到自由黨唔緊張嘅，因為形勢實在唔掂。早排「睇緊啲」兇周松崗風波田少𤓓爆，民望急跌，周梁又因為旅發局單聆訊，喺立法會同前手帕交臧明華開晒拖，A字膊形象即時喺巿民腦海扎根，如果唔快快補鑊，執靚返個形象，真係隨時墮馬。
劉健儀或避戰港島
八方又聽人講，自由黨原本諗住搵劉健儀出選港島區，但山中方七日，形勢又變晒喇喎，原來黨高層同葉劉已經有「默契」，出年會支持葉劉參選。上次遮打論壇兩太對壘，自由黨都有派人撐場，幫葉劉製造千軍萬馬嘅氣勢，不過後尾來自五湖四海嘅支持者興奮過度上晒頭，推完鐵馬又爆粗，搞喎咗個場，自由黨先費事同啲暴民黐埋一齊啫。