商場、大廈聖誕燈飾圖案千篇一律，唔係聖誕老人就係聖誕樹，好氣氛卻老土，馬鞍山利安邨利華樓互助委員會今年搞搞新意思，喺大廈外牆掛起由幾個數目字組成嘅燈飾，點知竟然有刁民投訴，房屋署介入要求互委會「將就吓」拆除燈飾！
互委會掛燈飾遭阻撓
前排警方掃蕩「拾肆K」T恤，今次輪到邊幾個數字咁敏感，要房署干涉呢？利華樓互委會主席曾磊強同八方講，佢見特首煲呔曾今年送份「大禮」政改報告書畀市民，諗住應節又順應民意，就使25蚊買咗串燈泡，砌成「2012」四個數字掛喺外牆營造節日氣氛，點知上周末掛上燈飾後，冇耐就收到房署屋邨辦事處來電質詢。
職員表示有街坊投訴「2012」燈飾「引起不安」，希望互委會「就一就，改一改」，曾生斷然拒絕，「我都係想街坊關心2012普選啫，咁都唔得？係咪上面唔同意2012年普選就唔掛得，要改掛2017？」房署職員無功而回死心不息，當晚再派職員向曾生施壓，「佢要求我拆落嚟，否則佢哋會郁手。」曾生堅持唔屈服，「我話夠膽你就拆，你一拆我就報警！」
房署昨再收兩投訴信
經曾生喝止，房署不敢輕舉妄動，呢個代表唔少香港人心願嘅燈飾先得以保留，繼續發光發亮。曾生好感慨咁講：「連掛燈飾都政治審查，唔可以逆北京意思，我以為古代先有文字獄，估唔到香港都有。」
某啲人認為「2012」燈飾篤眼篤鼻，據知噚日房署再收到兩封匿名投訴信，知情人士同八方講，今次投訴嘅刁民好有可能係左派支持者，佢哋對民主派搞㷫爭取2012普選睇唔順眼，想透過房署打壓普選訴求。房署發言人稱職員只係向互委會「反映」有居民投訴，署方冇要求亦冇計劃拆除燈飾，亦唔會審查燈飾訊息，只規定不能懸掛商業性同淫褻性燈飾。
四個普通數目字竟然掀起一場政治審查風波，八方擔心香港呢股「數字獄」歪風越吹越烈，係咪連車牌、身份證號碼、電話號碼都禁用2012呢？如果北京否決2017普選，咪要禁多樣？為對抗呢股「數字獄」歪風，八方呼籲大家一齊掛起2012燈飾，全城亮燈向北京表態，一日冇普選，一日唔熄燈。