花旗股市上個禮拜五做得好好，道指升咗205點，納指同標普都升超過1.5巴仙，港股食住個勢，今日表現應該唔會令人失望。
港股今日半日市，有咁好嘅客觀條件配合，恒指開市應該可以挾上28000樓上，至於企唔企到喺28000樓上收市，就要睇吓好淡雙方嘅角力，話晒呢個水平都好重要，尤其係放假返嚟第2日就係期指結算。
呢啲市通常係強者越強，如果炒短線揸住強勢股炒兩日已經夠，近期炒親上去都離唔開地產股，尤其係最大嗰兩隻。
新地C輪3885：新地（016）上周五收160.2元，上次喺50日線反彈衝咗上170元，今次又喺嗰條線反彈，一於睇180元，可以諗吓隻C輪3885，隻輪上周五收24仙，槓桿6.6倍（有效3.9倍），對冲值0.59。
新地升上180元，3885應該有5成以上升幅，正股跌穿152元止蝕。