平安夜燈飾：HotCha×Freeze過平安夜

石詠莉（Sukie）：最愛日本聖誕

雖然今日平安夜，不過我哋都係要開工度過！講到聖誕要好氣氛，就一定要有雪先會有感覺；早年香港人好鍾意玩「噴雪」，不過太易燃、太危險，提吓大家唔好亂玩、亂噴呀！最喜歡嘅聖誕係喺日本過，因為好多家人都喺日本，一家人過就最開心！香港冇白色聖誕，不過今日喺TimeSquare影相都覺得都好有白色小鎮氣氛，好鍾意呀！

陳樂榣（Alley）：皇后小鎮勁有Feel

其實我係從加拿大返嚟，不過覺得香港過聖誕真係又熱鬧、又有氣氛，淨係燈飾呢樣，世界上冇乜邊個地方靚過香港！最鍾意嘅聖誕蒲點係皇后像廣場個聖誕小鎮，雖然今年唔係旅發局搞，改由基督教團體聯合舉辦嘅「世界之光」，但都OK好氣氛！靜靜話畀大家知聽日25號係Sukie生日，要開工之餘，我哋都會同佢搞生日會，由平安夜同佢慶祝到聖誕日，今年聖誕特別有意義！

甄穎珊（Carisa）：純白海港城至靚

我都一樣覺得香港嘅燈飾聖誕係最靚嘅，今年做得最靚我覺得係海港城，純白聖誕加燈光效果，平安夜約朋友影相最一流。我覺得大家應該多啲留喺香港，月亮唔一定外國先至圓嘅，多啲人留港過節又消費，咁香港聖誕先至又熱鬧又好氣氛嘛！

■冇預備服飾？Carisa話周街都有舖頭賣聖誕服飾，冇有怕！

Fans話：真人比上鏡靚！

約Freeze呢隊近期熱爆「人造」靚女做訪問，仲扮成聖誕熱女郎逛中環皇后像廣場同老蘭等地，記者所見所有男女途人完全睇到「金睛火眼」！現場觀眾睇住記者拍平安夜特輯後，都話Freeze真人比上鏡仲靚女。

美國遊客（左起）JoJo、Sam、Rahul：奇怪！香港聖誕女郎點解個個都咁靚女？原來係女歌手組合，唔怪之得咁可愛又靚啦！

6歲孖女（右起）June＆Jennet：
我想同靚姊姊影相，仲想同佢哋捉迷藏㖭！佢哋係咪聖誕女郎嚟㗎?

1歲孖女（左起）思思&嫻嫻：聖誕女郎呀！我哋仲攞埋聖誕禮物㖭呀！

阿軒（30歲）：酒吧街好多人討論緊佢哋係咪Freeze，不過我一眼就認出！真人比Video仲靚女。

銅鑼灣　TimeSquare
人潮最多買嘢有禮

TimeSquare永遠係聖誕呢類大時大節嘅聚腳集散地！今年佢哋玩白×紫主調聖誕小鎮，室外有浪漫的水晶球可以影靚相，室內就有音樂旋轉木馬畀你重拾小時候回憶，影相包靚！除咗由早至晚長期有聖誕老人駐守外，購物滿$800仲會可以喺2樓小鎮攞走熊BearBear公仔、食即場即造棉花糖等等。

■二樓大堂裝飾成白×紫聖誕小鎮，畀人任影相。

■今日平安夜，仲不時會有聖誕歌舞表演。

中環　世界之光
香皂飄雪宗教味濃

如果已經討厭「柴娃娃」式過平安夜，今晚可以一試充滿宗教色彩嘅「世界之光」。每年中環皇后像廣場化身做聖誕小鎮，不過今年已改由基督教團體「全城更新」接棒！一樣的55呎巨型聖誕樹，配以清幽肥皂泡沫造出的仿飄雪效果，Freeze三位靚女都話聖誕氣氛濃到化不開。加上今日平安夜由中午12點至凌晨，不斷有Hip-Hop舞、音樂劇報佳音，同鼓、結他等音樂大合奏，開開心心玩住過聖誕。

■Freeze話皇后像廣場的聖誕小鎮已經成為香港一個傳統，平安夜必玩！

■皚皚飄雪、陣陣飄香！香港都有白色飄雪？原來係肥皂泡泡。

中環　蘭桂坊
NaturalHigh自發街頭派對

聖誕呢啲日子，老蘭一定係潮人必蒲之地！Freeze拍攝之日，着晒成套聖誕女郎衫，即引來大班蒲精過嚟搭訕兼請飲酒，佢哋教路話最好今晚7點先上嚟，咁就可以避過人潮管制排隊上山。雖然蘭桂坊今晚冇特別節目，不過好多人都會自發着晒聖誕老人/女郎衫上嚟玩，臨近Midnight大家仲會自發唱歌、跳舞加倒數，講氣氛就絕對熱爆。

■Freeze話去蘭桂坊，最High係自發性街頭派對。

■都話老蘭係玩NaturalHigh，拍攝日已經見到好多街客玩到㷫烚烚。

金鐘　PacificPlace
逛聖誕老人屋企影合照

PacificPlace今年較特別之處，係大家唔使去到芬蘭咁遠，都可以探吓聖誕老人屋企；呢間聖誕老人華麗大宅設於ParkCourt位置，接近3,000多呎！最緊要係大家只需繳付$60，就可以喺裏面任影相，同聖誕老人影寶麗來同有薑餅食；唔想花費者，亦可以到港鐵入口位──LGGardenCourt睇鋼琴、芭蕾舞同踢躂舞免費表演，真係盡享節日氣氛。