我車報員上星期先話灣仔「人頭馬」車行，會喺聖誕節期間搞個全新NissanGT-R車展，嗰刻諗住部車最快都要嗰日先到香港吖！哈，點知喺平安夜之前一日，已經有線人打電話畀我，好High好大聲同我講話喺貨櫃碼頭見到GT-R蹤影，仲叫我快手飛車去灣仔睇吓㖭！
記者、攝影：車報員
聽到呢個消息之後，連約咗老媽子飲茶都唔理，即刻飛去灣仔睇吓咩環境；去到見到部BlackEdition嘅GT-R擺咗喺「人頭馬」車行Showroom出面，成班Staff好勤力咁抹緊部車，等佢可以靚靚仔仔咁同班Fans見面；點知呢個時候，好多途人不論大人細路都俾佢吸引住，望到實一實之餘，仲拎埋相機或者手機出嚟影相留念，幾乎可以用萬人空巷嚟形容。諗諗吓又係呀，呢款有戰神美譽嘅GT-R闊別咗車迷9年，今次終於重現大家眼前，兼且仲換埋個型Look，同埋可以炮製出480匹馬力嘅3.8公升V6引擎喎，有齊呢啲條件又點會無Fans忠心耿耿咁等佢出現吖！想知多啲關於新GT-R嘅嘢？咁就要留意我哋《Car通》喺明日（12月26日）嘅詳細介紹啦！
