賓架G到洲際酒店扒房吃晚餐，發覺淨係吃一客沙律都要三百銀，價錢甚貴。既來之，則安之，當脕「一人前」吃了一千元，走出嚟，行在彌敦道上，見到幾位衣着不光鮮嘅老人家，突然醒起上星期曾有長者示威要求增加生果金。賓架G對佢哋去中大畢業禮搗亂，有啲反感，但在中環街頭見到佢哋遊行，則認為走對門路，理應如此，因在不同場合做不同的事也。賓架G覺得自己一頓晚飯就吃掉一千大元，人哋上街爭取嘅，係一個月一千元生果金，有些少罪惡感噃。
大家坐埋飲茶之時，賓架G吐出「罪惡感」，前輩賓架W話：「鞋，杜甫詩句，朱門酒肉臭，路有凍死骨」，唐代前，唐代後，中外社會莫不如此，只有三反五反文革時期，中國先至有平均社會，均貧也，大家一齊捱窮，窮到生不如死。一到改革開放成功，中國又恢復常態──有一個貧富不均嘅社會。大家不必對此太傷感，平時做多啲善事便是。」
在座有幾位退休前輩，家財豐厚，加埋起嚟，佢哋家族捐錢辦教育，數以億元計，但又各自每個月領取生果金，前輩C記得好清楚：「我哋七十歲以上，唔使入息審查，一申請，每個月就有七百零五蚊，政府在銀行戶口自動轉賬。」咁有錢，點解仲攞生果金？佢哋話此乃原則問題，交稅多年，政府派錢，攞番一份好應該，最多咪又捐番出去做善事，費事益政府庫房收埋唔知點好！
飲茶後，突接資深基金經理雷賢達電郵。基金雷原來在網站寫稿，佢口述，記者筆錄。雷兄傳來最新一篇，內容大概話：「今年市場環境非常好，金融界人士的收入大幅增加，○七年將要結束，大家在重視投資收益，展望美好前景的時候，可否花一點時間，精力和金錢，向弱勢長者伸出援手，我呼籲金融界同仁向需要幫忙的老人家慈善機構捐一點錢，幫助有需要的人，共建一個和諧社會。」基金雷慨嘆「在不少人眼中不算是錢的1000元」，長者要遊行爭取，各位老友忙於安排去邊度食聖誕大餐之時，請諗一諗這是不是一個和諧社會應該存在的現象！