加Turbo發放175匹威力　從容跑山

自小已被紳寶外形所吸引，尤其900系列那筆直且闊大的「大銀幕」，北歐古典味甚濃。紳寶是造飛機起家，對動力及舒適度要求比人高，推出新版9-3SportSedan動力同舒適度唔使講，加上外形獨特，駛出街個個都讚你有Taste喇！

文、攝：法拉李
Model：Ivy

車頭大型面網配尖而微彎向上的頭燈，黑色下眼線襯托銀色燈眉，着燈後銳氣十足。兩公升Turbo引擎發放175匹馬力，在2,500-3,500rpm發揮265Nm扭力，在半山區多彎路段穿梭遊走，坐滿4人上山斜路表現從容得很。5前速加減波箱轉波反應柔順舒服甚有大車風範，過彎時亦無明顯傾側，而且軚盤感覺實在，能細緻反映路面狀況。最令我印象深刻莫過於行車時車廂內超寧靜表現囉！
若然嫌馬力不足，代理仲有2.0TSVector及V62.8TSAero兩個版本以供選擇。兩者動力比2.0TVector強大得多，配備亦較豪華舒適；後者更配有6前速加減自動波，夠Power點跑都得，要玩扭力亦得，不過要等到08年至抵港囉，畀啲耐性喇！

設備小巧有心思

瑞典車鋼水好夠安全，車架紮實唔怕撞之餘亦直接令行車表現有所提升，全車配有8個安全氣袋，設備亦是歐洲一貫的豪華及舒適。前排兩張半桶形電動座椅，坐上去舒服又貼身，轉急彎都唔會左搖右擺。後排座椅中間置有大型手枕，足夠兩個朋友枕手都毋須爭位。
前排冷氣送風口同杯架設計有心思，用嚟控制冷氣風口嗰粒「的」好似Notebook嘅TrackPoint咁夠盞鬼。杯架伸出嚟嘅時候似足變形金剛反吓轉吓好得意！當手掣完全放下嘅時候就會隱藏於波棍同中央手枕位，設計好獨特。