亞洲遊戲展2007　GT5P高清全女打

一年一度嘅遊戲界盛事「亞洲遊戲展2007」又嚟喇！今年繼續以SCEH佔地最大，並且起咗個面積達16,000呎的PlayStation圍城招呼各位機迷。機迷現場可親身試玩GT5P、WE11、TimeCrisis等最新遊戲之餘，加上全部PS3皆以高清電視播放，總數多達98台PS3任玩，今個聖誕假期真係要去玩番轉。

記者：許福合
攝影：梁細權

GT5P50人爭試

今年年尾PS3頭號大作，當然係萬眾期待嘅《GT5Prologue》！前排因為中文版要延後推出，令唔少機迷大失所望，所以唔少入場機迷都係抱住中文版《GT5P》未出前，正式入來揸番轉！而SCEH亦知道機迷焦點都擺晒喺《GT5P》，所以門口就擺咗架靚車，仲搵嚟一大班《GT》靚女，既畀到記者們影靚相，又令現場生色不少。講番遊戲展，由昨天中午正式向公眾開放，飛奔入場的機迷除咗去排隊買各式遊戲紀念品，就係排隊試玩《GT5P》，高峯期估計最少有50人以上排隊，認真熱鬧！

■試玩台都會配上車架，手感比手掣更好。

■畫面靚一向係《GT》系列特色。

13車架型爆

現場眾多PS3試玩台之中，《GT5P》就佔有13部之多，而且每台仲配上車架，揸起來自然特別有手感！不過對於玩慣手掣嘅機迷，用軚盤一般反應都話比較難揸，所以現場所見，機迷試玩情況都係左碰右撞居多，甚少見到有高手可以揸得順暢！雖然係咁，但都無降低機迷對《GT5P》的評價，尤其對畫面之靚，更係人人讚不絕口。最過癮係俾筆者見到有位小朋友Kelvin，都要落場「無牌」架駛，可惜佢人仔細細，連踏油門腳掣都唔夠腳長，自然撞翻車，但佢仍笑住話勁好玩。

機迷試玩

Manning

覺得幾難揸，但畫面真係好靚，考慮緊去買PS3來玩。

Yuki

我有時都會入機舖玩賽車遊戲，覺得《GT5P》比較難揸。

小朋友Kelvin雖然人仔細細，但揸起車上來好有台型！

DevilMayCry4試玩版公開

另一大廠Capcom大作PS3《DevilMayCry4》亦有於會場設置試玩台。據Capcom方面透露，雖然版本屬於「東京遊戲展」試玩版，不過亦有作出唔少更新，可讓機迷玩到最接近正式版的內容。試玩過後，筆者主要覺得畫面及音效都比以往大幅提升，遊戲系統也改進唔少，主角會配備大劍及手槍之外，右手還會有惡魔之力，主要用來遠距離攻擊敵人；另外還加入加速裝置，用來控制力度，而畫面上亦有速度計，試玩時可以留意。

■《DevilMayCry4》屬少數未推出已提供試玩版遊戲，所以特別受歡迎。

■加入惡魔之力，主要用來遠距離攻擊。

WinningEleven2008球迷最受

《WinningEleven》一向係唔少機迷至愛，最新版《WinningEleven2008》更有人表明會為佢而購入PS3，可見吸引力非同小可，而遊戲展亦特別提供區域畀玩家現場鬥波！場地設計其實都幾花心思，地面用上足球場設計，吸引唔少機迷喺度即場鬥波，仲有唔少機迷兼球迷，分享波經心得，氣氛認真唔錯。可惜現場試玩台並無加上鏡頭，機迷唔可以即場變身成為場內的球員，未能玩盡整隻遊戲的出色功能。

■場地也採用球場設計，頗有心思。

■遊戲內可插入自己面孔成為球員，可惜現場未配置鏡頭。

TimeCrisis4似足機街

由街機移植到PS3嘅《TimeCrisis4》，雖然剛剛推出，不過現場人氣都唔錯，原因係遊戲展內PS3都會配上LCDTV試玩。而《TimeCrisis4》所使用的GUNCON3槍掣，同街機版手感相近，有玩過嘅人都話喺遊戲展玩同機舖玩極為相似，仲可以免費任玩㖭！PS3版另附有獨家內容及劇情，即使係打爆街機版的神槍手，來玩PS3版亦有新鮮感。