新城勁爆頒獎禮被金牌娛樂高調發聲明杯葛，事件越演越烈，原本有望攞獎的小肥，昨日更缺席於元朗舉行的《07樂壇新人巡禮》，不過新城公關卻只表示小肥「因事不克出席」，看來仍希望作最後努力破冰。
金牌娛樂日前聲明全體歌手將缺席新城勁爆頒獎禮，連帶其他新城活動都一併缺席。昨日一班新人齊集新元朗中心出席新人巡禮，雖然海報上印有小肥的照片，不過他卻未有到場，記者向在場新城公關查詢，只獲回應稱小肥有事所以未能出席。
「總之好可惜」
與小肥同屬新人的江若琳對事件表示可惜，她說：「我知佢哋（金牌娛樂）嘅歌手唔會到，之前小肥同我講話唔去我都有啲好奇。」提到小肥今年本來有望攞獎時，她答道：「總之好可惜囉，佢係好朋友又唔可以出席，不過人哋公司政策都冇辦法。」
而任嘉賓的關智斌接受訪問時，則力撐新城說：「有冇出席機會應該都一樣嘅，唔會話邊個唔嚟就冇獎攞啩。不過人哋公司嘢都唔理得咁多，呢啲係大人嘅事，我哋呢啲小朋友唱歌算喇！」今次事件令屬英皇的洪卓立奪獎呼聲更高，同門女新人鍾舒漫回應時說：「唔關幫唔幫邊個事，我覺得獎係一個鼓勵，唔得獎亦都唔代表啲乜，佢哋兩個其實都好有實力。」
另外，有消息指新城有見今年股市暢旺，財經台收入水漲船高，故有意將娛樂台改組，加入大量財經節目。娛樂台只剩下午1點至7點節目，亦有傳每小時緊接新聞後報道娛樂消息的《點正娛樂》會被腰斬。
至於身為環球一哥的譚詠麟（校長）前晚為艾粒騷擔任嘉賓時，談及金牌歌手缺席新城頒獎禮一事，他笑說：「頒獎禮都未開始，傳言啫，做乜唔去呀？好忙呀？忙住拎奧運獎牌呀？」
籲樂壇團結
校長更一臉認真表示出席頒獎禮是歌手工作一部份，他說：「娛樂圈最重要係有麝自然香，未有實力到嗰個位，畀個獎你都唔係好事。𠵱家香港樂壇水深火熱，大家應該團結一致。」
對於報道指因為古巨基的男歌手獎落到李克勤手上是導火線之一，校長指一切都是傳言，他續說：「如果頒獎禮變成咁就唔係好事，大家要搞起個樂壇而唔係搞事，之前有啲乜嘢過節就唔好再提啦。」
採訪、攝影：藍文浩