擾攘多時嘅前居屋紅磡海濱南岸，早幾日突然獲批售樓紙，發展商新地同新世界隨即急召代理，派發價單，即晚開賣；個盤原本一路吹風話趕唔切聖誕前開售，𠵱家突然推盤，搞到班代理陣腳大亂，急急Call客到尖沙嘴新世界中心商場售樓處。
紅磡新盤渴市
紅磡區已好耐冇新盤供應，積存一定購買力，有心入市嘅話，睇完示範單位，可以親身到現樓附近視察環境，順道去黃埔行街Shopping，記得睇埋下晝3點同5點半，喺黃埔新天地船景街舉行嘅星之奇藝坊表演，先好返屋企。
呢個奇藝坊，係由十幾名俄羅斯同烏克蘭籍嘅奇藝精英組成，佢哋會喺舞台上演繹一連串奇藝項目，包括由3位世界冠軍級健碩型男，表演挑戰人體極限嘅「力量鐵三角」，今次表演場地喺戶外，佢哋會特別加料炮製超高難度嘅空中項目，唔好錯過呀。