醫藥股聞到有炒味，呢瓣sector當中，維奧生物（1164）係滄海遺珠，08年PE講緊得7倍，要昅昅。維奧主打產品「樂力」鈣片，07年頭9個月純利3972萬銀，升咗66%。而樂力鈣片單喺第3季，銷售額已經上到1.64億銀，直迫上半年1.7億銀。主打產品銷得，07年度純利坐定粒六，估計維奧全年度純利5000萬銀，PE都係10倍多少少。
又維奧呢期以2.08億銀收購醫藥分銷商四川恒泰，齋計四川恒泰今年頭9個純利上2550萬銀，收購PE都係8倍。收購項目收益08年度全面反映，維奧純利起碼上到7500萬銀，預期PE得番7倍。再講，上星期五，醫藥股好似中國製藥（1093）、金衛醫療（8180）起步，博資金追炒同類股，買維奧。以維奧現價（0.345元）翻半番到0.51元計，08年度PE都係11倍。
北青非常抵買
傳媒股呢期幾乎全部見底回升，獨漏北青傳媒（1000），北青抵買非常。北青今年6月底止，每股淨現金高達6.6元。集團上市咁耐，跌足咁耐，由高位23蚊到家陣，跌幅挨近80%，現價4.98元，仲低過每股淨現金值，殘到不堪。又北青息率4厘，同類股中又係最吸引。加埋北青最頂頭阿媽，係北京市政府，先咪講北青有冇注資概念，以咁雄厚背景，使乜驚？現價博上番每股淨現金值，潛在升幅都32%。
錢雋