聖誕節快到，自由黨噚日喺沙田派禮物，一向牙擦嘅「食力簡」簡炳墀，噚日着起件自由黨制服幫手，八方以為佢入咗黨，點知簡Sir話佢係獨行俠，現身係幫細仔永輝撐場。
做委任區議員
簡Sir一開口就盡顯牙擦本色，佢指幾個仔女中，簡永輝讀書「有啲食力」，喺倫敦帝國學院讀書，有工程師同大律師雙重專業資格。乖仔學業、事業兩得意，八方恭喜簡Sir都嚟唔切，點知佢大鬧個仔，話佢最近接受煲呔委任做北區區議員認真「冇出息」，「做區議員得萬幾蚊人工，大律師打一場官司，分分鐘賺十幾萬啦！」
簡Sir話自己一直唔支持委任制，所以佢多次參選，靠自己唔使等運到。對於細仔加入自由黨，簡Sir話係明智抉擇，因為入黨一定要揀有錢、有「食力」嘅政黨先好入，否則貼埋錢從政就真係捉蟲。自由黨確係好有米，噚日派咗2,000幾份免費禮物，田少見到選民好識做，跪地派禮物影相當然冇問題啦。