噚晚做冬好多家庭都好好餸，白鴿黨多名成員更加要食飽啲，因為佢哋今日起開始絕食，唔填飽個肚都幾難捱，黃成智話往年做冬係例行公事，今年要準備絕食，心理作用覺得啲餸特別好味，為咗爭取普選，犧牲小小口腹之慾冇所謂。
有絕食經驗嘅林子健同八方講，因為佢打算26號起連續絕食100小時，為令腸胃適應冇米到肚滋味，減少不適情況，佢近兩日已經逐漸減少食量，變相提早開始絕食。
今次為期一星期絕食行動用接力形式進行，參加者捱一、兩日肚餓就有人接棒，不過白鴿黨好穩陣，據講已安排醫生喺絕食尾聲日子幫參加者檢查，萬一有不適情況可以即刻接受治療。