時日無多嘅港台舉行公眾諮詢大會，吸引唔少港台fans到場聲援，其中曾先生可以話係超級忠實擁躉，佢對港台節目有讚冇彈，批評兩間免費電視台唔識貨，安排部份港台節目半夜三更播出，又唔宣傳，搞到好嘢冇人欣賞。曾先生愛之深責之切，提出咗個好獨特意見，「我發現港台嘅節目字幕仲用緊新明體，TVB同ATV都冇再用呢種字體。」
港台向來係維園阿伯眼中釘，蕭伯噚日就踩場，佢批評《頭條新聞》主持人吳志森肆無忌憚醜化公眾人物，但就好錫住自己人，對夜蒲出醜而辭職嘅朱培慶，同埋涉嫌醉駕嘅張文新隻字不提，蕭伯更高舉一張寫咗首諷刺朱培慶嘅打油詩紙牌，以示不滿。