吊車跌落嚟話咁快又過咗半年，昂坪360噚日終於重新載客試搭，揚言冇有怕做第一個乘客嘅商務及經濟發展局局長馬時亨信守承諾，噚日帶頭坐吊車，仲搵埋大班高官名人撐場，可惜試坐期間吊車忽然停駛約10分鐘，雖然有驚無險，不過都幾失禮。
馬時亨表現異常興奮
馬時亨坐吊車時表現異常興奮，全程手舞足蹈坐唔定，可能要掩飾處男坐吊車嘅內心恐懼；自由黨林健鋒指舊吊車處處生銹，新車先坐得人。其實咪又係同一架車，換咗顏色啫。梁振英全程戴住頂聖誕帽，個樣最滑稽；釋智慧之前逐一幫車廂灑淨，佢喺昂坪坐吊車落山，但回程時寧願搭巴士。
八方代表納稅人責成昂坪360要盡快令遊客恢復搭吊車嘅信心，拋磚引玉畀個建議佢哋參考。據稱吊車行行吓忽然停低，涉及一時三刻解決唔到嘅技術問題，第日正式運作時吊車都會發生同類事件，呢個可能係吸引遊客嘅獨特sellingpoint，試問除咗360，世界上仲有邊架吊車會行行吓忽然停低唞唞先？呢種咁特別嘅旅遊「驚驗」只此一家！八方保證，連鬼都敢扮嘅海洋公園主席盛智文，都唔敢抄橋。
全港獨家可坐地起價
「失驚無神半天吊」變成獨市生意，屆時360一於坐地起價，基本門票包中途停頓最少五分鐘，豪華版保證停足10分鐘，畀得起錢買超豪門票嘅，仲可以一程多次停頓不少於15分鐘，鬼節、萬聖節前後推出特別版，乘客可以享受無限時半天吊滋味，嚇餐飽先值回票價。
以上措施推出前要有配套宣傳，八方建議由特首心戰室全權負責，再教育市民對乘坐吊車呢種活動喺思想上有範式轉移（Paradigmshift），要大眾明白吊車唔一定要不停行駛先係正常，亦可以行行吓忽然停低半天吊嘅，市民對360忽然停頓習以為常，自然會買飛享受半天吊樂趣。
喺市民未接受360一定會半天吊呢個事實之前，八方強烈要求馬時亨每日乘搭第一班車，過程喺網上直播，相信可以挽回遊客信心，同時請釋智慧法師駐場為有需要乘客作福，上車後就各安天命咯。