記者G係AC米蘭球星卡卡（KaKa，原名RicardoIzecsondosSantosLeite）嘅大粉絲，知道卡卡成為世界足球先生之後，高興非常。卡卡得到好多體育記者嘅票數，大距離拋開阿根廷小將美斯，攞世界足球先生名銜，實至名歸。
睇AC米蘭對小保加嘅直播，爭奪世界球會冠軍盃，卡卡真係好波，有速度，有腳法，能傳中，能射門，能盤球過人，視小保加後防如無物，射入一球，助攻兩次（assist，以NBA術語講），觀眾無不拍爛手掌。十年來世界球壇有邊位中場球員有佢咁好波呢？諗嚟諗去，碧咸唔係嗰皮（冇速度，盤球技術麻麻），謝拉特林柏特嘅盤、傳、速度與佢差一皮，只有施丹、朗奴甸奴可與之比較，但係咯喎，講身形、瀟灑、靚仔，呢兩位點可以同卡卡比較呀。卡卡其實靚仔過碧咸，為人又清純，入球之後，佢嘅慶祝方式係拉高件球衣，露出底衫，底衫上面有句口號，BelongtoJesus，攞世界足球先生之日，領獎後致詞，多謝主，果然虔誠得好緊要。點解佢冇碧咸咁多fans，冇咁多廣告收入呢？大概有些少邪氣嘅碧咸更受現代女士歡迎，虔誠教徒球星只會做住家男人。卡卡話到明佢喜歡留在AC米蘭，唔去英超聯，唔知係唔係因為宗教原因呢？你知啦，英超球星久唔久就有瘋狂性派對嘅新聞，實在唔係卡卡嗰杯茶。
前AC教練卡比路就唔同，六十一歲咯，做過AC、羅馬、祖雲達斯、皇馬教練，每隊都在佢領導下攞聯賽冠軍，故此願意到英國接受挑戰，摩連奴既然唔肯做，就等佢嚟。卡比路唔識講幾多句英文，但在倫敦記者招待會上，大講意大利文，發豪言壯語，話率領英格蘭取得世界盃（二○一○）冠軍，然後退休，係佢嘅終極目標。上一次英格蘭贏世界盃，已經係一九六六年，領隊藍西受封為爵士，假如卡比路真係掂咗，意大利人唔知可唔可以攞爵士榮銜呢？英國小報已搵記者去佢意大利故鄉搵料，到目前為止，仲未搵到任何衰嘢。呢位卡比路生平只愛四件事，足球、老婆、歌劇、古董，正經過正經，咁悶嘅人，實會悶死英國啲小報。