馮仁昭四圍超<br>Freeze素顏睡衣on-line真人騷 - 馮仁昭

馮仁昭四圍超
Freeze素顏睡衣on-line真人騷 - 馮仁昭

女子組合Freeze繼出位MV之後,最近又搞咗個「新居入伙真人騷」chatroom,由下星期一(24日)開始on-line,連續做一個月,雖然每日只係中午12點至12點半,做半個鐘,但佢哋3個就一齊搬咗入灣仔尚翹峰同居,直到個騷做完為止。噚日Freeze着晒睡衣喺新屋做宣傳,睡衣唔性感有啲失色,佢哋話:「係做番自己,話明係真人騷,要畀真實一面網友睇。」

定6大家規

相見好同住難,三個女仔住埋一齊,好容易因為啲小事反面,所以為咗住得安樂,佢哋一齊度咗6大規條,呢個月就要守住協議,陳樂榣話:「大家合作咗大半年算有默契,會互相遷就。」不過訂協議時已經發生拗撬,甄穎珊話:「其中一樣唔可以夜過3點瞓,朝早唔可以超過11點起身,我成日失眠㗎,但係呢樣我又冇得反對。」

佢哋訂立的Freeze六大家規,其實都係碎料嚟啫,小朋友都遵守得到啦!

同居開賭局

咁帶男朋友返屋企又得唔得呢?Freeze呢樣就好夾,一齊話大家都冇男朋友,但會請啲圈外同圈內朋友上屋企做節目嘉賓,仲可以打邊爐,石詠莉話最衰三缺一,唔係就可以開枱打麻雀搵娛樂,陳樂榣即刻話三個人都可以玩「鬥地主」(一種啤牌遊戲),睇嚟佢哋都不愁寂寞。
甄穎珊噚日冇化妝,好勇敢畀個真面目大家睇,佢好自信咁話自己個樣都見得人。其實佢係因為左眼感染細菌,醫生叫佢休息幾日唔好化妝,不過佢臨尾都加句:「咁我呢個樣都OK。」
Freeze真人騷網址: http://www.hkreporter.com

估唔到Freeze嘅睡衣look,竟然係咁普通,肯定令一大班電車男失望。