此日晨早起床，將電視頻道轉去彭博電視，赫然見到訪問陳太談香港特區政制發展，相信係重播節目嚟嘅。陳太當選做立法會議員，以議員身份，接受外國傳媒訪問，順理成章，佢嘅英文講得咁好，啱晒，正好發展佢嘅國際影響力。不過如此一來，豈止特首辦頭痛，連西環都睇到眉頭皺，因為佢哋最唔想見到之事，已經發生咗。
中午與政論Ｋ食飯，佢話從不同渠道，聽到中方甚為勞氣，第一，賠了夫人，失去馬力嘅議席；第二，為了葉劉淑儀，犧牲了民建聯整體利益（如需要鍾樹根，葉國謙服從大局，甘心退出唔參選），換回來的，竟然係葉太埋怨民建聯給予她一個負面形象。西環雖然唔出聲，政論Ｋ話曾鈺成就認真唔高興喎。
政治講完，講番電視。BloombergTV最近改變畫面，走CNBC方式，節目主持人佔晒整個畫面，只有右上角不停播放最新市場指數變化。但右上一小角面積太細，容納不了多少資料，對觀眾無甚參考作用，唔似得以前咁詳細；兼且以前播廣告之時，市場動態資料仍然一路顯示出嚟，𠵱家就取消晒，成個畫面都係廣告，與CNBC完全冇分別。咁搞法，左丁山就冇心機睇彭博TV咯，佢嘅節目無甚特色，放棄自己嘅最大賣點而順從廣告商，未必夠CNBC爭啫。不過彭博財雄勢大，經營有佢自己一套方法，我哋觀眾嘅意見，佢毋須理會嘅。
傳媒搶廣告，究竟以取悅讀者為先，還是取悅客戶為先？左丁山以前聽過兩位人士嘅講法。一位係肥佬黎，佢話過初期一定要取悅讀者，爭取到銷量與大量讀者人數之後，與廣告公司自然容易傾得埋欄；另一位資深出版界名人就堅持取悅廣告商，用靚紙靚相靚設計，佢話可以營造一股高檔氣味，吸引啲名牌廣告喎，至於內容呢？扮吓文藝，扮吓新潮流，扮足yuppie品味啦。眨吓眼，事隔十零年，肥佬黎由香港至台灣，縱橫報紙雜誌氣勢仲係唔錯。至於嗰位名人，已在本港出版界失蹤。為何如此，左丁山不知其原因。