戴夢夢最喜愛的節日是聖誕節，不過近年她都要在工作中度過，她希望日後有機會到外國過一個白色聖誕，完成她多年的心願。每年夢夢都送聖誕卡予眾親友，今年卡上會有漫畫版的她，希望大家會喜歡。
聖誕節是藝人的搵錢黃金檔期，不少倒數活動或商場都會找藝人做騷，戴夢夢今年也不例外，開工度佳節，不過工作之餘，她也希望工作完畢後可以與朋友相聚狂歡一番。
有雪便浪漫
夢夢表示聖誕是她最喜歡的節日，而且最想過一個白色聖誕，她說：「成日都覺得聖誕係要好凍，有好多雪，又可以砌雪人，個感覺好sweet，如果有埋男朋友陪就仲好啦，不過冇都唔緊要，有雪已經覺得好浪漫。」
夢夢表示將來有機會必要一試白色聖誕的滋味，因為近年香港天氣越來越暖，根本沒可能過一個凍冰冰的聖誕節，她說：「其實我都有去過韓國滑雪，唔係冇睇過雪，不過個感覺始終唔同。」
堅持送實物
夢夢每年聖誕必會親自寫聖誕卡送給親朋戚友，雖然現今科技發達，可以用email送卡，但她還是堅持以最原始的聖誕卡送上心意，夢夢說：「每次寫張卡list好似我請飲咁，要寫成百幾張，以前就會自己買卡，入咗行之後就開始印有我嘅相做卡，今年會用漫畫版嘅我做聖誕卡，我覺得送上真實嘅卡比較窩心，感覺好warm，所以我堅持每年都會咁做。」
採訪：胡比 攝影：陳俊強