一向愛蒲的謝婷婷，加拿大畢業回港後表明想打名牌工，她前晚就首次向名牌示好，破例為Celine示範手袋，更落場親自調校雞尾酒，大搶風頭，不過她就表示要搵有實力又可以學嘢的工作，各大品牌老闆相信都收到。
謝婷婷、汪圓圓、名模DeniseKeller、盛智文女兒MarisaZeman和四洲集團太子女戴凱欣等，前晚在中環為Celine示範新手袋Nautil系列，之後又各自調校一杯雞尾酒。
姪仔時常笑
甚少為品牌做示範的婷婷，以Celine彩藍色tubedress亮相，但就不時用手揞心口，避免走光，她說：「其實係第一次做呢類presentation，感覺都OK，調酒就未試過，不過我估都唔難。」畢業回港後，透露正搵工的婷婷，樣貌身材出眾，問她可有意做模特兒？她說：「唔知，啱啱返香港，反而想睇吓有乜嘢品牌適合我，𠵱家想了解多啲香港市場先。」心儀甚麼風格的品牌？她為免倒Celine米，十分識做的改口說：「主要係工作性質，我想跟一個值得尊重又學到嘢嘅人。」
提到婷婷的姪兒Lucas，她說：「好健康，個人好長好高，眼睫毛又長，仲成日笑，我買咗一對深啡色嘅羊皮靴，畀佢做聖誕禮物。」至於如何度聖誕，及有否拍拖，她即時耍手擰頭不肯回答。
換片似打仗
此外，汪圓圓穿一條高衩裙，露出雪白大腿，她表示打足底，又透露首次為胞姊汪詩詩與甄子丹的初生嬰兒James換尿片，汪圓圓說：「𠵱家屋企好亂，個個都好忙，我見佢喊咗成兩分鐘都冇人理，咪幫佢換片囉，好似打仗咁，換到我標晒汗。」她指家姐仍傷口痛，行動較慢。
採訪：LawWaiMan
攝影：ChenWaiOn
