鄭秀文（Sammi）和許志安這對過氣情侶，昨日齊齊演出澳門回歸騷，但Sammi未等大合唱便先行離開，未知是否避與安仔同台出現。Sammi聲稱在後台有跟安仔打招呼，更揚言會鍥而不捨游說他信教：「我會寃魂不息寃住佢。」 澳門直擊
鄭秀文、許志安、林子祥、李克勤、陳奕迅、楊千嬅、何超儀、張敬軒、何韻詩和衞蘭，昨日下午到澳門運動場為「慶祝澳門特別行政區成立八週年暨迎奧運萬人演唱會」表演助興。打頭陣的Sammi，在30名舞蹈員伴舞下獻唱了一首8分鐘快歌medley，聲勢浩大，但其後她跟何韻詩合唱了一首歌曲後，便以今日要晨早拍電影為由，提早離開，沒有跟安仔及千嬅等在完場時大合唱，令人懷疑她刻意避與安仔同台。
「人大咗唔怕醜」
不過Sammi接受訪問時卻聲稱有跟安仔碰面，她笑說：「我一早知有安仔，我喺後台撞到佢，本應成班artist一齊坐直升機嚟，後來大霧冇直升機坐，改坐船，但安仔趕唔切，唔知佢係咪搭舢舨嚟？」對於安仔指Sammi成為基督徒後變得開朗，她說：「我一向開心，做乜講到我以前咁慘？人大咗唔怕醜，表達或者表白多咗，以前含羞答答啲。我認同安仔講，係開心咗，但絕對唔承認以前唔開心。」
日前有報道指Sammi捐獻千萬給教會，她沒好氣說：「離晒譜，捐幾多我唔會講，洗禮同捐錢係兩回事，唔好講到我咁有錢，本雜誌講嗰個數目，相信要李嘉誠先至做得到。」問會否叫安仔信教？Sammi說：「安仔話時間未到，不過我會鍥而不捨，寃魂不息寃住佢，因為我好想將開心帶畀身邊嘅人。」
自稱虔誠瞓教徒
對於被Sammi踢爆遲到趕不及跟大夥兒上船，安仔解釋說：「唔好話我遲，我冇得搭直升機，又搭唔到佢哋班船啫，噚晚睇波睇到好夜。」未知Sammi有沒有向他傳道？他說：「Sammi冇刻意向我傳道，我係虔誠瞓教徒，但有時聽Sammi講，都想攞本《聖經》出嚟睇吓。」
此外，陳奕迅與女舞蹈員表演期間，頭部幾乎貼住她們臀部，千嬅則透露她憑電視劇《武十郎》獲得內地電視台頒發最佳女主角獎，並於今日到內地領獎。
採訪：李珮洳 攝影：陳俊強
同場加映跌錶事件
