一直以來十分重視聖誕節的鄭融，已經籌備好於聖誕當日廣邀好友於家中開party，日前她專誠抽空去學習焗製聖誕薑餅，希望到時充當大廚炮製一餐豐富的聖誕大餐招呼好友。
在眾多節日當中鄭融最喜歡聖誕節，她認為這個節日的氣氛特別濃厚，故她最愛留在家中與家人及朋友歡度。雖然聖誕當日鄭融一如往年要在工作中度過，不過她一早相約好大班朋友，待她完成工作後返回家中舉行派對。
「食晒有滿足感」
鄭融說：「我覺得慶祝聖誕節一定要留喺屋企，因為個感覺會更加warm，加上我好鍾意整嘢食，所以會叫啲朋友上我屋企食餐飽，見到佢哋食晒我整嘅嘢食，就會好有滿足感！」
日前鄭融去到尖沙嘴一間甜品學校焗製聖誕薑餅，原來她一直都希望焗製大量薑餅送給朋友作為聖誕禮物，她說：「除咗火雞之外，薑餅就係最代表到聖誕嘅食物，我記得細個屋企人會帶我去一間酒店游水，每年聖誕嗰度都有一間好大嘅薑餅屋，每次行過我都會順手搣啲落嚟食。」
似乳豬好恐怖
不過在過往的聖誕節，阿融最記得前男友一家在內地買了一隻燒兔仔慶祝，她說：「因為我以前男友係英國人，佢哋慶祝聖誕係會食燒兔仔，我當時見到隻兔仔好似成隻乳豬咁，我覺得好恐怖，而且唔夠膽食，因為我覺得好殘忍呀！」
採訪：李珮洳
攝影：陳順禎
髮型：KateShek@hiphairculture
化妝：VinCTsang 場地提供：BestKitchen