由於戰友蘋果波神外遊，今期《開倉版》主打由我吾中頂上，唔熟唔食，今期主打一於揀本人最熟嘅荷甲，推介燕豪芬迎烏德勒支開「主勝」。（球賽編號：星期六42；無綫收費電視26及now826台明日2:30am直播）
衞冕嘅燕豪芬近況麻麻，喺聯賽爆冷不敵到訪嘅洛達之後，又於歐聯出局，本來睇死佢哋喺上仗訪阿積士嘅聯賽大戰會再輸一場。點知，天無絕人之路，場波因為警察要求加薪示威而取消咗，等燕豪芬球員可以休養生息。
燕豪芬唞夠火力猛
喺星期六嘅聯賽，燕豪芬仲幾近「夫添」，3大前鋒法芬、拿索域及高化文斯都可以披甲；加上中場西蒙斯同龍門靴里奴高美斯等主力仍能候命，人腳遠遠喺烏德勒支之上，而且燕豪芬近6次迎戰烏德勒支全部勝出（其中有4次仲係淨勝兩球或以上），就算烏德勒支有前鋒基哥雲廸積克近況「弗」，近4場入3球，都一於冇有怕，「讓球主客和」燕豪芬[-1]，捧「主勝」，合心水嘅話仲可以吼燕豪芬勝3:0、同埋4:1呢兩個波膽。
英超必取阿仙奴「大」
至於海倫芬同埋川廸呢兩支荷甲球隊踢法夠晒主動，加上前者有射手艾方素停賽期滿復出，而佢嘅前線拍檔施邦又近況「弗」，今迎同樣有前鋒尼古科態勇但有後衞維拿特停賽嘅川廸，入球「大」雖然只得1.62倍，但勝在穩陣。
英超方面，既然「現場直擊」嘅蘋果波神都話阿仙奴迎熱刺會開「大」，冇理由唔信佢啫！另外，仲可以補埋戰友青蛙仔大力推介嘅阿仙奴勝熱刺3:1嘅波膽。
至於英冠，葉士域治係今季英冠主場王，至今主場未嘗敗績，一於追到佢哋斷路為止，周六迎戰般尼時，老葉單W同埋[-1]、「主勝」，都可以兼顧。
近5場往績：走贏贏輸輸
吾中
買嘢講名牌，但賭波一定唔會做名牌奴隸嘅大聯盟女神。