2007年臨近完結，周國賢於昨日標尾會公佈喜訊，親證明年3月再做老竇，原來其韓籍太太李美英現已懷孕近7個月，腹中塊肉是女嬰。喜不自勝的周國賢表示將為B女取名Rachel，他每夜睡覺時，還會把頭鑽進被窩跟未出生的小寶寶傾心事，認真搞笑。
日前剛滿28歲的歌手周國賢，本已育有一名5歲大囡囡Clara，兩個月前本報曾拍得他偕韓籍妻子李美英遊車河兼到數碼港逛超市買朱古力，當時周太肚凸凸、腰肢渾圓，似足懷孕，但其時周國賢予以否認，原來他擔心小生命「小器」，至昨日他終親口證實太太已懷孕約7個月，預產期為明年3月，將採取自然分娩。
老婆靈活四圍走
昨日周國賢接受記者電話訪問時興奮地說：「太太有咗，𠵱家都接近尾聲，BB如無意外會係女，我鍾意女多啲，好開心㗎，BB英文名暫時叫Rachel，兩個音好讀啲，鬧佢時都會方便啲，中文名就遲啲搵高人改。」
周國賢夫婦為迎接小生命，近日買了不少有關胎教的育兒書，但周國賢喜半夜三更匿進被窩，對着太太的肚皮跟B女傾心事，他笑說：「要預早培養感情吖嘛，成日一齊傾偈㗎，BB夜晚先會郁，所以我會伸個頭入被同佢傾偈，但又好驚嘈醒老婆。」他稱母親和外母都買花膠給太太補身，笑說：「其實太太好健康，佢唔覺得自己有咗，成日周圍走，好彩佢都唔論盡。」
申請明年放產假
上次周國賢做老竇純屬意外，今次則是刻意造人，因他不想孩子之間年齡相距太遠，難得大女沒有呷醋，他更打趣說生女比生仔好：「生仔係蝕本生意，結婚要幫人哋賺錢，乜都畀晒老婆，生女乜都賺晒㗎。雖然我再做爸爸，心情係越來越緊張，好期待小生命來臨。」他笑謂將向所屬的華納唱片申請明年放「產假」。
採訪：葉雪