10月底同事Dennis去完東京車展見過新一代戰神NissanGT-R之後，返到香港就成日讚部車點正點正；跟住又到編輯龍急不及待玩PS3新Game《GT5P》，猛讚部GT-R勁過AudiR8，仲話1月出中文版嗰陣再買一次喎，真係頂呢兩個Fans唔順！
港商鬥快返貨
不過，香港嘅新GT-RFans又點止佢兩個吖，我車報員聽聞有好多車迷，已經急不及待走去各大車行，打聽新車何時到港嘅消息；而各大車行亦已磨拳擦掌，希望可以第一時間將戰神運抵香港，務求借此打敗對手云云！為咗呢件事，我車報員不惜捐窿捐罅，周圍八吓睇吓有無新GT-R嘅消息；經過一輪明查暗訪，終於八到話喺灣仔嘅「人頭馬」車行，喺聖誕節期間將會喺佢哋嘅Showroom搞個GT-R車展，屆時將會展出唔同版本嘅GT-R，等班Fans可以望真啲部車喎！
另外，我仲八到佢哋頭批貨聽日便到港落船，數目約20部，有齊普通版同頂級版，其中10部仲已經名花有主。車價大約要110萬嘅跑車都可以賣到咁好成績，除咗可以話部車嘅魅力真係沒法擋之外，最重要都係經濟好咗好多嘛！
記者：車報員